COVID-19 UPDATES

0 21

Andu 127 nimarekereretue kuuma thivitari ngurani na gukinyia namba ya andu aria mavorete murimu wa Corona Virus mwigana wa 2,414.Akirekereria ndumiriri ino minister thiini wa ministry ya ugima wa mwiri Mutahi Kagwe augite andu engi 181 nimanyitikanite na murimu uyu,kuuma kwi ithimi 191,394   na gukinyia namba ya andu aria marwarite murimu uyu mwigana wa ngiri 8,067 kuuma giiko kia mbere kianirirwa tariki 14 mweri wa kathatu mwakari.

Thiini wa maumirira maria marekererua ni ministry ya ugima wa mwiri wauguo kuronania  andu engi ana nimakuite kumana  na murimu uyu vai mathaa 24 mavitukite  na gukinyia namba ya andu aria makuite vururi kumana na murimu wa corona virus 164.Namba ya andu aria makuite kumana na murimu uyu ni  gicunji kia 2.03 vai igana  na gukorwa itakwambatira vai muthenya wa kairi kirumaniriri,ino ikionania ni  ripoti mbega nundu namba ya andu aria makuite ithiite na mbere na kuthii nthi ikionekana kurugamira gicunji kia 2 vai igana mweri wa mugwanja ikiringithanua na mweri wa gatandatu gicunji kia 2.5 vai igana ,naguo mweri wa gatano   ukiandithithia gicunji kia 3.4 vai igana ,naguo mweri wa  kana  ukionania niguo wai na ikuu nyiingi ikirugamira vai gicunji kia ithano vai igana.

Mutahi Kagwe niugite kwina arwaru engi ngiri 5,489 aria maramukira utungata wa urigiti thivitariri ngurani ,na aria maravewa utungata miciiri kwao .Vai andu aya 181 aria mekirwa kirore  gukorwa na murimu uyu vai na mwana wa mieri ina .Namba ya andu arume aria mekiritwe kirore gukorwa na murimu uyu ni 123 na atumia 58 ,ndeto ironania namba ya andu arume ni engi gukira atumia

Leave A Reply

Your email address will not be published.